Vetaksident i rëndë, shoferi dërgohet me urgjencë në QKUK

Mosrespektimi i shenjave të komunikacionit, mospërshtatja me kushtet atmosferike e shpeshherë edhe tejkalimi i shpejtësisë së lejuar janë disa nga rregullat që vozitësit jo rrallë herë i shkelin. E si pasojë e kësaj, aksidentet dhe vetaksidentet janë të pashmangshme, shkruan Gazeta Sinjali.

Edhe pasditen e sotme ka ndodhur një vetaksident në fshatin Bizhtazhin në Gjakovë, ku për pasojë shoferi ka pësuar lëndime të rënda trupore.

Burime nga Emergjenca kanë bërë me dije se bëhet fjalë për një 36-vjeçar, i cili ka pësuar frakturë në këmbë, për shkak të aksidentit që shkaktoi, duke përfunduar jashtë rrugës me veturën e tij. Përveç shoferit, edhe pasagjeri ka mbetur i lënduar.

I dyshuari që u lëndua rëndë fillimisht është trajtuar në Spitalin e Gjakovës, e më pas është transferuar në Qendrën Klinike Universitare të Kosovës, për shkak të gjendjes serioze.

Në vendin e ngjarjes ka dalë një njësi e Policisë së Trafikut, teksa për rastin është vënë në dijeni edhe Prokurori i Shtetit.