Arrestohet një 17-vjeçar për prerje të pyjeve
Një 17-vjeçar është arrestuar për prerje të pyjeve, të dielën rreth orës 9, në fshatin Brod të Shtërpcës.
Sipas policisë, i dyshuari po i transportonte drunjtë me veturë ilegalisht nga Parku Kombëtar “Malet e Sharrit”.
Policia e stacionit në Shtërpcë, veç aktiviteteve rutinë dhe atyre të planifikuara, bazuar në planin aktiv “Mbrojta e Pyjeve” pas disa informacioneve që ka siguruar, sot rreth orës 09:00 në fshatin Brod ka ndaluar një automjet xhip që po e drejtonte personi H.S., i moshës 17-vjeçar dhe i cili transportonte drunj ilegalisht nga Parku Kombëtar “Malet e Sharrit””, thuhet në njoftimin e policisë.
Policia e ka konfiskuar automjetin për dokumentacion të parregullt dhe ndaj drejtuesit ka shqiptuar një gjobë pa patentë shoferi dhe tjetrën pa regjistrim të automjetit, ndërsa Drejtoria për Administrimin e Parkut Kombëtar (DAPK) “Sharri” ka shqiptuar fletëparaqitje ndaj personit për transport ilegal dhe i ka konfiskuar drunjtë.
