E rëndë: 23 vjeçarja tenton t’i japë fund jetës duke kërcyer nga kati i 8

Një ngjarje e rëndë ka ndodhur mbrëmë të dielën në rrugën “Hashim Hajdini” në Fushë Kosovë, ku një vajzë ka tentuar t’i jap fund jetës së saj, për motive ende të panjohura. Rasti tronditi familjen, të cilët arritën të kërkojnë ndihmë nga Policia, e cila shpëtoi familjaren e tyre, raporton Gazeta Sinjali.

Burimet e Sinjalit kanë bërë me dije se viktima, e moshës 23-vjeçare, është shpëtuar nga Policia në momentin e fundit, kur ajo veçse ndodhej në katin e tetë të banesës, prej ku deshi të hidhej për të bërë vetëvrasje.

Kjo situatë alarmoi jashtëzakonisht shumë familjen e saj, derisa zyrtarët policorë arritën në vendin e ngjarjes dhe pasi arritën të komunikonin me vajzën, e bindën për t’u larguar nga ballkoni dhe për ta hapur derën e banesës.

Ajo që dihet deri më tani është se Prokurori i Shtetit ka urdhëruar nisjen e hetimeve, në drejtim të veprës “Tentim vetëvrasje”.