Lirohet për qarkullim pika kufitare në Merdare

Pikat kufitare në Jarinje, Bërnjak dhe Merdare kanë qenë të bllokuara, si për hyrje ashtu edhe për dalje.

Madje, Ministria e Punëve të Jashtme dhe Diasporës mbrëmë paralajmëroi të gjithë shqiptarët që po udhëtonin drejt Kosovës që të shmangin udhëtimin përmes Serbisë, ose nëse veçse janë në territor të Serbisë, të shfrytëzojnë pikat tjera kufitare, raporton Indeksonline.

“Ju njoftojmë se në territorin e Serbisë, në afërsi të pikave kufitare në Jarinjë dhe në Merdare, për shkak të protestave që po mbahen, nuk është i mundur kalimi i autobusëve dhe kamionëve që vijnë nga Kosova. Protestuesit kanë bllokuar gjithashtu pikën kufitare në Bërnjak. Nuk është i sigurtë për momentin as kalimi i veturave” bëri të ditur mbrëmë MPJD.

Megjithatë, në përditësimin e fundit, Ministria e Punëve të Brendshme njofton se janë liruar për qarkullim edhe këto pika kufitare.

Përpos këtyre tri pikave kufitare, të lira janë të gjitha pikat tjera, në të cilat nuk ka as kolona.

Indeksonline ka tentuar të kontaktojë Policinë e Kosovës për t’i pyetur nëse ç’bllokimi për qarkullim vlen edhe për kamionët serbë, të cilëve Qeveria u ndaloi hyrjen në Kosovë, por që nuk ka marrë përgjigje deri më tani./Indeksonline/