LAJMI I FUNDIT: Ky është kryetari i ri i LDK-së në Podujevë
Ekrem Hyseni është zgjedhur kryetar i LDK-së në Podujevë.
Që në nisje të këtij procesi u shprehën pakënaqësi nga disa të pranishmit, duke kërkuar rregulloren e punës.
Pakënaqësi lidhur me procesin zgjedhor të kësaj partie ne Podujevë ka shprehur edhe ish-kryetari i saj i dikurshëm, Agim Veliu.
Në një prononcim për Raporto24, Agim Veliu ka thënë: “Procesi sipas mendimit tim dhe informacioneve që i kam nuk ka shku mirë. Është proces shumë i dëmtuar, i korruptuar, i montuar, me shumë parregullsi, me shumë shkelje, me shumë marrëveshje pa kuvende zgjedhore, disa kuvende të anuluara ku ka pas prezencë. Kështu që janë një mal me shkelje”.
Sipas Veliut, LDK-ja nga ky proces do të dëmtohet edhe më shumë dhe do të ulet edhe më shumë.
“Nuk pres diçka nga ky Kuvend. Pres me këto zgjedhje që janë bërë me këtë proces që është bërë tepër i dëmtuar, pres që LDK-ja të dëmtohet edhe më shumë, LDK-ja të ulet edhe më shumë, sepse një proces tërësisht i manipuluar nëpër nëndegë, nuk besoj që mund të prodhojë diçka që mund të jetë e hajrit për proceset e ardhshme politike”, ka thënë Agim Veliu për Raporto24.
Mirëpo përkundër këtyre pakënaqësive, Veliu ka thënë se do të mbetet në LDK gjithë, mirpo do jetë kundërshtar i atyre që sipas tij po e dëmtojnë LDK-në.
“Unë në LDK gjithë. Po me disa prej këtyre që po e dëmtojnë LDK-në do të jem kundërshtar i tyre në të mirën e LDK-së së vërtetë”, është shprehur Veliu.
