Ekrem Hyseni falenderon mbështetësit

Me 90 vota pro, delegatet e kuvendit zgjedhor të degës së LDK-së në Podujevë, kanë zgjedhur sot pasdite Ekrem Hysenin kryetar të kësaj dege.

Me anë të një postimi në llogarinë e tij në Facebook, ai ka falënderuar të gjithë mbështetësit për besimin që ia kanë dhanë, njofton Klan Kosova.

“Pas një procesi të rregullt, demokratik, e me pjesëmarrje masive, sot me një kuvend madhështor, përmbyllëm një proces të jashtëzakonshëm zgjedhor ku morën pjesë mbi 1400 anëtarë të shtëpisë tonë politike LDK”, ka shkruar Hyseni në Facebook.

Sipas tij, i gjithë procesi u zhvillua konform rregullave të miratuara nga organet e partisë dhe për rrjedhojë në degë nuk kishte asnjë ankesë të vetme.

“Falënderoj strukturat tona për një punë të madhe. Uroj të gjitha strukturat e zgjedhura dhe falënderoj ato që me sukses përfunduan mandatet e tyre”, ka thënë ai.

“Falënderoj në mënyrë të veçantë delegatët e degës që me bindje të lirë e sovrane me dhanë besimin për ta udhëhequr LDK-në e Llapit drejt fitoreve”, ka shtuar më tej Hyseni.