Rrëzohet punëtori nga 5 metra lartësi
Punëtorët në Kosovë përballen me sfida të shumta, e ndër to janë edhe kushtet në vendet e punës dhe rreziku që u kanoset. Jo rrallëherë ata e pësojnë keq, madje edhe tragjikisht, qoftë në ndërtimtari, apo edhe në sektorë të tjerë. Një rast i tillë i lëndimit në punë ka ndodhur edhe gjatë ditës së sotme në Dobërllukë të Vushtrrisë, raporton Gazeta Sinjali.
Burimet e Sinjalit bëjnë me dije se një punëtor i një kompanie private, derisa ka qenë duke punuar në një objekt, është rrëzuar nga rreth 5 metra lartësi dhe për pasojë ka marrë lëndime trupore.
Viktima, i moshës 23-vjeçare fillimisht është dërguar në Emergjencën e Vushtrrisë e më pas u transferua në Qendrën Klinike Universitare të Kosovës, për trajtim të mëtutjeshëm.
Me urdhër të Prokurorit të Shtetit rasti është iniciuar si “Asgjësim, dëmtim ose heqje e pajisjeve mbrojtëse dhe rrezikshmërinë e sigurisë në vendin e punës”.
