E dhimbshme: Punëtori i KEDS humb jetën në vendin e punës (FOTO)
Një ngjarje e rëndë ka ndodhur sot rreth orës 11:30 në fshatin Zym të Dragashit, ku një person ka humbur jetën gjatë orarit të tij të punës, raporton Gazeta Sinjali.
Sinjali mëson se viktima është Mehdi Skeraj, 57-vjeçar.
I ndjeri ishte punëtor i KEDS-it dhe në momentin që ka dhënë frymën e fundit, ishte duke punuar në afërsi të një restoranti.
Ekipi mjekësor i Emergjencës ka dalë në vendin e ngjarjes, ku pas ekzaminimeve për shenjat vitale, mjeku ka konstatuar vdekjen e viktimës.
Në vendin e ngjarjes kanë dalë edhe njësitë policore, të cilët kanë kryer ekzaminimet e nevojshme që ndihmojnë në zbardhjen e rrethanave të rastit.
Togeri i Policisë së Kosovës në Prizren, Shaqir Bytyqi, tha për Sinjalin se shkaqet e vdekjes nuk dihen ende dhe me vendim të prokurorit rasti është cilësuar ‘Vdekje e dyshimtë’ dhe trupi i pajetë është dërguar në Institutin e Mjekësisë Ligjore për obduksion.
