Podujevë: 22 shtëpitë e banimit për familjet në nevojë janë në fazën përfundimtare të punimeve

Ka filluar sot asfaltimi i rrugëve në lagjen e re e cila po ndërtohet nga bashkëpunimi mes Komunës së Podujevës dhe shoqatës “Shqiptarët për shqiptarët”.

Këto punime sot i kanë përcjellur nga afër kryetari i Komunës, Shpejtim Bulliqi, drejtorët Adelina Stublla dhe Leutrim Krasniqi, si dhe përfaqësuesi i shoqatës Sylejman Rrahmani.

Para pak ditësh 22 shtëpitë e banimit në këtë lagje janë furnizuar me inventarin e brendshëm, kurse pas përfundimit të infrastrukturës rrugore dhe finalizimit të detajeve të fundit të projektit do të ofrohen çelësat për 22 familje llapjane me kushte jo të mira ekonomike-sociale.

Kryetari Bulliqi u nda i kënaqur me cilësinë e punimeve që po zhvillohet në realizimin e këtij projekti, si dhe u zotua për angazhim të mëtutjeshëm që secilës familje në Podujevë me kushte të rënda jetese t’i bëhet zgjidhje permanente e banimit.