Ngjarje si në filma: Vjehrri përzë babain e nuses, gjuan me armë

Konfliktet mes familjes së gruas dhe dhëndrit, janë të shpeshta në vendin tonë. Ato shpesh eskalojnë edhe në fyerje, të shara e sulme fizike. E përpos grushteve, në shumë raste përdoren edhe mjete të forta e armë, ku si pasojë, shumë herë kanë përfunduar edhe tragjikisht, raporton Gazeta Sinjali.

Telashe pati së fundi edhe në familjen Miftari në fshatin Mirosale të Vitisë, ku kryefamiljari dyshohet se ka përzënë babanë e nuses i cili kishte shkuar në shtëpinë e tyre për vizitë.

Sinjali mëson se këtë ai nuk e bëri duarthatë, por që me një armë të cilën e mbante me vete. Në gjithë këtë tollovi kishte ndërhyrë djali i të dyshuarit, i cili ka arritur që t’ia shtyjë dorën babait të tij dhe me këtë rast dyshohet është shkrehur edhe arma.

Për rastin u njoftua edhe Policia, të cilët kanë dalë në vendin e ngjarjes ku kanë gjetur dhe sekuestruar një gëzhojë, një predhë dhe armën që dyshohet se u përdor në rast, ndërsa i dyshuari është shoqëruar në stacion policor.

Pas përfundimit të procedurave policore, Prokurori i Shtetit ka nxjerrë aktvendim që 63-vjeçarit t’i caktohet masa e ndalimit policor nën dyshimet për kryerjen e dy veprave penale ‘Mbajtje në pronësi, kontroll apo posedim të paautorizuar të armëve’ dhe ‘Shkaktim i rrezikut të përgjithshëm’.