Abdixhiku: Edhe nota 2 është e lartë për këtë qeveri

Kryetari i Lidhjes Demokratike të Kosovës, Lumir Abdixhiku ka thënë se qeveria aktuale e Kosovës nuk është duke menduar për të ardhmen.

“Kosova është vend i vogël për të mos qenë vend i mirë. Spitalet, shkollat, rrugët të gjitha janë në gjendje të keqe. Nuk kemi politikë që mendon për të ardhmen. Na duhet ta kthejmë Kosovën politikën në ‘Rrugën e Re’”, tha Abdixhiku.

I pyetur se me çfarë note e voton punën e qeverisë, Abdixhiku tha se kjo qeveri nuk mund të ketë notë kaluese.

“Për këtë qeveri edhe nota 2 është shumë e lartë. Kjo qeveri ka polarizuar vendin, ka ndarë njerëzit. Nuk kemi reaguar në fillim të qeverisjes për të parë qytetarët që kjo rrugë e qeverisë nuk sjell ndryshim”, tha Abdixhiku në emisionin Radar të RTV Dukagjinit.

“E drejta jonë nuk është mjaftueshme pa ndihmën e aleatëve. Nuk mund t’i thuash Evropës tigër prej letre”, tha Abdixhiku duke folur për sanksionet që iu kanë bërë Kosovës.

Abdixhiku tha se LDK është rikthyer në zgjedhjet e fundit lokale dhe se me fitimin e 9 komunave, përfshirë edhe kryeqytetin, e kishte vërejtur potencialin dhe rritjen e partisë.