Burrë e grua rrahen mes vete

Telashet në familjet kosovare nuk kanë të ndalur. Përditë në Polici raportohen numër i madh rastesh, ku konfliktet mes bashkëshortëve shpesh përfundojnë edhe me dhunë fizike e psikike, për çka nevojitet ndërhyrja e Policisë. Një rast i tillë ka ndodhur dje në një familje në Prishtinë, raporton Gazeta Sinjali.

Këtë herë, një burrë e një grua përfunduan në Polici pasi u rrahën me njëri – tjetrin në rrugën “Sokol Sopi”.

Burimet nga Prokuroria kanë bërë me dije se gjithçka nisi pas një zënke, e cila pasoi me dhunë fizike, ashtu që të dy pësuan lëndime trupore.

Dy palët u shoqëruan në stacion policor, ku kanë dhënë deklaratat e tyre lidhur me incidentin që ndodhi mes tyre.

Pas përfundimit të procedurave policore, me urdhër të Prokurorit të Shtetit, ndaj tyrë është iniciuar rasti për veprën penale “Dhuna në familje”.