DigitAlb del me sqarim për transmetimin e kanaleve të Supersport në Kosovë
Kompania televizive, DigitAlb ka lëshuar një komunikatë për të sqaruar mungesën e kanaleve të tyre në televizionet kosovare.
Në njoftimin e tyre bëhet e ditur se kompania është e hapur për oferta të reja për të vazhduar operimin e tyre në territorin e Republikës së Kosovës, mirëpo nuk bëhet e ditur arsyeja e ndërprerjes së transmetimit.
“Nisur nga spekulimet e ditëve të fundit, DigitAlb deklaron se është i hapur për bashkëpunim dhe distribucion të kanaleve televizive kundrejtë të gjitha Platformave Televizive dhe të Telekomunikacionit në Republikën e Kosovës, në mënyrë që i gjithë publiku në Kosovë të ketë qasje. Kompania po punon në këtë drejtim dhe të gjithë operatorët e interesuar nga Kosova janë të ftuar të lidhin marrëveshje me DigitAlb për këtë qëllim”, thuhet mes të tjerash në njoftimin e tyre.
Që nga viti 2004, DigitAlb është transmetuar në të gjithë botën përmes rrjetit satelitor. Tash e sa vite, DigitAlb ka operuar në Kosovë përmes tri kompanive televizive, ArtMotion, Kujtesa e Ipko, mirëpo transmetimi i tyre është ndërprerë nga 1 janari i këtij viti.
