Drejtuesit e Llapit vizitojnë Veliun pas lëndimit që pësoi

Sulmuesi i Llapit, Valmir Veliu ka pësuar një lëndim të rëndë në gju që pritet ta mbajë atë larg fushave për një kohë të gjatë.

Veliu është lënduar gjatë fazës përgatitore, ndërsa ditë më parë ka kryer edhe ndërhyrje kirurgjikale.

Lajmin për lëndimin e Veliut e ka bërë të ditur klubi llapjan.

“Sulmuesi ynë, Valmir Veliu e ka përfunduar me sukses intervenimin kirurgjik në gjurin e këmbës së djathtë në spitalin “Royal Medical” nga Dr. Qerim Kida. Lëndimi i Veliut ndodhi në fazën përgatitore në Antalya gjatë seancave stërvitore, ku pas kthimit në Kosovë ai iu nënshtrua kontrollave mjekësore. Aty u konstatua se Veliu ka pësuar rupturë të ligamentit ACL dhe që nuk do mund t’i shpëtonte dot operimit”, thuhet në njoftimin e Llapit

Veliu ishte rikthyer këtë sezon te Llapi pas periudhës së shkurtër në Turqi.

Për zëvendësimin e Veliut, Llapi ka bërë disa përforcime gjatë merkatos së janarit.