Kurti para Vuçiqit: Beogradi s’mund të lejohet të financojë kriminelët në Kosovë

Kryeministri i Kosovës, Albin Kurti, e nisi fjalën e tij në OKB-së duke i cilësuar si “të rreme” pretendimet për shkelje të të drejtave të njeriut ndaj serbëve që jetojnë në Kosovë, pas vendimit të BQK-së për dinarin. Kurti tha se rregullorja përpiqet që të sigurojë transparencë dhe jo të dëmtojë qytetarët, raporton Gazeta Sinjali.

Para Vuçiqit, Kurti tha se rregullorja e Bankës Qendrore të Kosovës nuk e ndalon Serbinë të ofrojë ndihmë financiare për serbët dhe se të njëjtat rregulla vlejnë për secilin vend.

 “Rregullorja as nuk e ndalon e as nuk e pengon Qeverinë e Serbisë prej ofrimit të ndihmës financiare për serbët e Kosovës, rregullorja përpiqet të sigurojë transparencë dhe siguri të importit të parave në Kosovë në përputhje me Kushtetutën. Të njëjtat rregulla vlejnë për të gjitha importet nga cilido vend dhe nuk ndalon transferet e dinarëve nga Serbia.”, tha Kurti.

“Beogradi nuk mund të lejohet pa fund të financojë kriminelët e terroristët e vet në Kosovë me rrjedha të tilla, që janë të paligjshme në Kosovë. Ky është burimi i vërtetë i histerisë së Serbisë për rregulloren e BKQ-së. Po ndalojmë thasë me para në kufi. Ata ankohen jo për shkak të brengës së qytetarëve serbë të Kosovës”, tha Kurti, raporton Sinjali.