Jasharaj: Qeveria nuk e dëgjon zërin e mësuesit dhe shqetësimet e tij

Kryetari i Sindikatës së Bashkuar të Arsimit, Shkencës dhe Kulturës, Rrahman Jasharaj, ka kritikuar Qeverinë e Kosovës me rastin e shënimit të 7 Marsit – Ditës së Mësuesit, raporton Gazeta Sinjali.

Përmes një komunikate për media, Jasharaj ka thënë se Qeveria nuk realizoi asnjë kërkesë të punonjësve të arsimit për kushte më të mira të punës.

Sipas tij, Qeveria u mundua që me masa ndëshkuese e me kërcënime për ndalje të pagave, ta shuajë zërin sindikal.

Tutje ka thënë se data 7 Mars sjell emocione të veçanta në Kosovë sepse rrugëtimi i arsimit dhe shkollës shqipe u përball me shumë sulme e furtuna të pushuesit.

“Një pjesë e lavdishme e arsimit tonë ishin edhe vitet e 90-ta kur punëtorët e arsimit duke bërë sakrifica sublime mbrojtjen arsimin shqip duke mbrojtur dritën kundër errësirës. Bota demokratike u mahnit me këtë gatishmëri e sakrificë të punëtorëve arsimor të Kosovës dhe u qëndroi pranë duke u dhënë përkrahje e motiv për të vazhduar për plot 9 vite me radhë në këtë mision të shenjtë. Urime dhe respekt në këtë ditë të madhe të mësuesit dhe shkollës shqipe për të gjithë pishtarëve dijes që nëpër vite e dekada vazhduan misionin e shenjtë të edukimit të brezave”, ka thënë ai.