Tri vjet në kërkim të ilaçit që Kosova nuk e ka

Ismet Nura nga Fushë Kosova që më shumë se tre vjet nuk po mundet të marr trajtim për sëmundjen e gjakut me të cilën po ballafaqohet. Ai ka treguar se para se t’i nënshtrohet intervenimeve kirurgjike, i është kërkuar që të marrë tri doza të ilaçit Eltrombopag, por që të njëjtin nuk po e gjen në asnjë nga barnatoret publike e private në vend. Ai ka treguar se një dozë e këtij ilaçi po i kushton rreth një mijë euro në barnatoret jashtë vendit, shumë e cila është e papërballueshme për të, shkruan Kanal10.

Që nga muaji maj i vitit 2019 ai është diagnostikuar me sëmundjen e gjakut, Trombocitopenia,e për t’iu nënshtruar intervenimeve të nevojshme për trajtimin e saj, ai ka treguar se i duhet që fillimisht t’i marrë 7 doza të ilaçit Eltrombopag.

Por edhe pse kanë kaluar tre vjet, ai ende nuk ka arritur që të merr as edhe një dozë të tij.

Nura ka treguar se vetëm një dozë e ilaçit po i kushton rreth një mijë euro në barnatoret jashtë vendit, shumë e cila thotë se është e papërballueshme për të. (LEXO MË POSHTË)

Nura është shprehur se disa herë ka kërkuar ndihmë financiare nga Ministria e Shëndetësisë për sigurimin e këtij ilaçi, por që nuk ka marrë përgjigje.

Nga Ministria e Shëndetësisë kanë thënë se kanë në kompetencë vetëm furnizimin e Qendrave Kryesore të Mjekësive Familjare me barna dhe material shpenzues.

Ndërsa, nga Shërbimi Spitalor Klinik e Universitar i Kosovës, kanë thënë se produkti nuk është në Listën Esenciale të Barnave dhe se nuk furnizohen me të.

E furnizim me të nuk kanë as barnatoret private.

Milaim Abdullahu, nga Shoqata e Distributorëve Farmaceutikë të Kosovës, ka treguar se ky ilaç përdoret për sëmundje shumë të rralla dhe se nuk është i regjistruar në tregun farmaceutik të Kosovës.

Për shkak që ilaçi Eltrombopag nuk mund të gjendet në barnatoret private në vend, e në ato jashtë Kosovës kushton shumë, Ismet Nura nga Fushë Kosova po pret që qytetarët t’i ndalin në ndihmë për sigurimin e tij.