Podujevë: Shpërndahen 200 pako me mish për festën e Kurban Bajramit

Komuna e Podujevës, në bashkëpunim me organizatën humanitare “Shqiptarët për Shqiptarët”, kanë shpërndarë 200 pako me mish për familjet në nevojë në kuadër të festës së Kurban Bajramit.

Çdo pako përmbante 4 kilogramë mish, duke synuar që të sigurojë ushqim për familjet me gjendje të rënduar ekonomike dhe të begatojë sofrat e tyre gjatë kësaj feste të rëndësishme fetare.

Kjo iniciativë e organizatës “Shqiptarët për Shqiptarët” u mirëprit nga banorët e Podujevës, të cilët shprehën mirënjohjen e tyre për këtë gjest humanitar.

Festat fetare janë momente të veçanta që mbledhin familjet dhe komunitetet së bashku, dhe ndihma e dhënë në këtë kohë ka një rëndësi të veçantë për ata që përballen me vështirësi ekonomike.

Përzgjedhja dhe shpërndarja e pakove është bërë me kujdes të veçantë nga Drejtoria për Shëndetësi dhe Mirëqenie Sociale e Komunës së Podujevës.

Listat e përfitueseve u përpiluan duke u bazuar në kriteret e gjendjes ekonomike të familjeve, me qëllim që ndihma të arrijë te ata që kanë më shumë nevojë.