Këtë vit planifikohet të kryhen punimet në rrugën Podujevë – Prishtinë (VIDEO)

Ishte nisur të ndërtohet tetë vjet më parë. Por nga ajo kohë, rruga Prishtinë-Podujevë edhe më tej vazhdon të mbetet e papërfunduar. Sidoqoftë, punimet e nisura në vitin 2016, pritet të përfundojnë brenda këtij viti, ndonëse qytetarët shprehen të lodhur nga kjo ngadalësi e kryerjes së projekteve.

Punimet në rrugën Prishtinë-Podujevë po kryhen edhe gjatë fundjavës. Të shtunën makineritë e rënda vazhdonin në disa vende të punonin.

Paralelisht me punimet, është shtuar edhe vështirësia për të kaluar në këtë rrugë shumë të ngarkuar.

Pluhuri e kolonat e gjata po ua vështirësojnë qarkullimin atyre që kalojnë nëpër këtë rrugë që lidh vendin edhe me pikën kufitare të Merdarit.

‘Po na pengon pluhuri, në shëndet. Po I dëmtojmë me vetura, me krejt. Po shpresojmë që shumë shpejt ka me u kry rruga”, tha qytetari, Lavdim Rrahmani.

Kurse qytetari tjetër, Shefqet Maloku ka thënë se ngadalë po shkojnë punimet.

Pjesëtarë të shoqërisë civile deklarojnë se përfundimi i këtij projekti po merr shumë kohë për t’u përfunduar.

“Shprehi indinjatën e nevrozën që kanë qytetarët e asaj zone me çështjen e rrugës e cila ju ka zgjat. Përveç që po ju bën dëme fizike e psikologjike kjo zgjatje po shkakton pakënaqësi të mëdha. Ky durim nuk do duhej të ishte për këtë çështje që po zgjat me vite”, ka thënë Albinot Maloku.

Ndërtimi i kësaj rruge ka përfunduar edhe në prokurori. Në maj të këtij viti,  zv.ministri i Infrastrukturës, Hysen Durmishi, është intervistuar nga Prokuroria Speciale në lidhje me këtë segment rrugor.

Megjithatë, ai ishte shprehur se në prokurori ka “sqaruar pastërtinë e plotë”.

Ndërkohë, për përfundimin e rrugës nacionale Prishtinë-Podujevë janë ndarë plot 38 milionë euro, ndërsa punimet pritet të kryhen brenda vitit.

Punimet kishin filluar në vitin 2016, ndërsa pretendimet ishin që ajo të përfundonte brenda tre vjetësh./rtk