Bulliqi: Video ku shihem me dy zyrtarë policor po keqpërdoret dhe deformohet
Gjatë ditës së djeshme ka qarkulluar një video e kryetarit të Podujevës, Shpejtim Bulliqi, duke biseduar me dy zyrtarë policor.
Disa kanë thënë që kjo ishte një fjalosje mes tij dhe policëve, por për këtë gjë ka reaguar vetë kryetari Bulliqi.
Ai me anë të një postimi ka thënë që kjo gjë po keqpërdoret dhe deformohet nga disa individë opozitarë.
Më poshtë postimi i tij:
Një video që po qarkullon në rrjete sociale ku shihem unë dhe dy zyrtarë policorë duke biseduar rreth lirimit të hapësirave publike po keqpërdoret dhe deformohet nga disa individë opozitarë, të cilët nuk po mund t’i kapërcejnë inatet personale dhe humbjen që qytetari ua ka përplasur për fytyre më 2021.
Në këtë situatë kaotike me të cilën po ballafaqohemi çdo ditë me uzurpimin e trotuareve dhe hapësirave të tjera publike, po bëjmë përpjekje maksimale që si institucione të koordinohemi për të vendosur rend dhe rregull. Në këtë kuptim ka qenë edhe biseda ime të premten e javës së kaluar me dy zyrtarët policorë.
Përkundër kësaj situate të krijuar unë i falënderoj zyrtarët policorë të cilët me përkushtim po i kryejnë detyrat dhe përgjegjësitë që i kanë.
Në të njëjtën kohë kërkoj edhe nga mediat që të jenë korrekte kur raportojnë dhe të mos bazohen në imagjinatën e disa opozitarëve (nëse kanë) të cilët po mundohen t’i “lexojnë” bisedat edhe pa i dëgjuar fare.
