AUV-i nuk lejon importimin e një ngarkese prej 26 ton mish të shkrirë të Brazilit

Agjencia e Ushqimit dhe Veterinarisë ka refuzuar importimin e 26,022 kilogramëve të mishit të gjedhit me origjinë nga Braizili, kjo gjatë kontrollimit në “Portin e Durrësit”.

Në njoftimin e lëshuar për media thuhet se mishi ishte i shkrirë dhe se kjo bie në kundërshtim me kriteret ligjore të sigurisë se produktit.

“Produkti nuk është ruajtur në përputhje me normat ligjore të përcaktuara për nivelet maksimale të temperaturave për produkte të ngrira. Poashtu ,në shikim vizual vërehet se ngarkesa ka rrjedhje si shkak i mosfunksionimit të duhur të pajisjes ftohëse”, thuhet në njoftim.

“Ngarkesa është e bllokuar-bllombuar dhe nën mbikëqyrje të autoriteteve kufitare të Kosovës. E cila do të kthehet në vendin e origjinës ose sipas procedurës, nëse pala parashtron kërkesë për asgjësim, asgjësimi kryhet nën mbikëqyrje”.

Ditë më parë, Ministria e Bujqësisë dhe Blegtorisë në Brazil e kishte suspenduar eksportin e mishit të shpezëve dhe produkteve të tij, pasi ka konfirmuar shpërthimin e një virusi.
Sipas ministrisë braziliane, suspendimi i eksportit të mishit të shpezëve prek 44 shtete, e që në mesin e tyre është edhe Kosova bashkë me Shqipërinë, Maqedoninë e Veriut.

Poashtu, Agjencia e Ushqimit dhe Veterinës së Kosovës ka thënë se pas njoftimit të lëshuar nga Ministria e Bujqësisë dhe Blegtorisë në Brazil për suspendimin e përkohshëm të certifikimit për eksportet e mishit të shpendëve dhe produkteve të tij, AUV menjëherë ka urdhëruar ngritjen e masave të kontrollit për të gjitha ngarkesat qe vijnë nga Brazili.