108 sulme nga qentë endacakë gjatë vitit 2022 (VIDEO)

Komunat e Kosovës vazhdojnë të përballen me problemin e pranisë së madhe të qenve endacakë. Asnjëra prej tyre nuk ka gjetur zgjidhje për trajtimin e tyre. Së fundmi edhe plani i paraqitur nga Komuna e Prishtinës për vendosjen e çipave po kundërshtohet nga opozita dhe shoqëria civile. Derisa, problemi të gjejë zgjidhje, qytetarët vazhdojnë të ndihen të rrezikuar, ku vetëm gjatë vitit 2022, 108 persona janë sulmuar nga qentë endacakë, shkruan Kanal10.

Ende i kanë mbetur shenjat e lëndimeve që mori nga kafshimi i qenit. Edhe pas tetë muajve që kur ka ndodhur rasti, Tomislav Perusiq, thotë se vazhdon të marrë trajtim mjekësor. Ai thotë se ishte sulmuar nga qentë endacakë në kryeqytet, derisa po kthehej nga puna. Përveç tij, janë edhe 108 persona të tjerë, të cilët vetëm gjatë këtij viti janë lënduar si pasojë e sulmeve nga qentë endacakë.

E pamje të tilla të grumbullimit të tyre nëpër lagje të Prishtinës, janë të shpeshta, derisa institucionet lokale vazhdojnë të mos e zgjidhin një problem të tillë. Komuna e Prishtinës së fundmi ka propozuar një plan, me të cilin synon ta zgjidhë këtë problem. Por, një propozim i tillë po kundërshtohet nga opozita në Komunën e Prishtinës.

Sipas Lëvizjes Vetëvendosje, zgjidhja e kësaj çështjeje kërkon veprime më urgjente. Kundër propozimit që qenve t’u vendosen çipa janë shprehur edhe nga organizatat jo qeveritare që merren me mbrojtjen e të drejtave të kafshëve. Me problemin e qeneve endacakë, nuk ballafaqohet vetëm Prishtina, por edhe komunat e tjera, të cilat ende nuk kanë gjetur zgjidhje për trajtimin e tyre.