Përplasje mes LDK-së e VV-së për koncertin që mbahet në Podujevë
Është bërë traditë që komunat e vendit të organizojnë koncerte gjatë muajve të verës për nderë të ardhjes së bashkëatdhetarëve, raporton Gazeta Demos.
Një të tillë e kishte paraparë edhe komuna e Podujevës, për të shtunën e 3 gushit, por të cilin e anuloi për arsye të reshjeve të shiut.
Të njëjtin ka vendosur që ta mbajë të hënën me 5 gusht.
Por, për këtë opozita në këtë qytet, Lidhja Demokratike e Kosovës, po e akuzon pushtetin se e ka shtyrë koncertin, pikërisht në ditën që ata e kanë planifikuar një ndejë me mërgimtarë.
“Komuna e Podujevës ishte e informuar që më herët për takimin tonë me mërgatën më 5 gusht, pasi ne kemi marrë miratimin-pëlqimin për shfrytëzimin e sheshit Ali Ajeti për këtë aktivitet. Pra, data jonë ishte e caktuar dhe e konfirmuar më pare”, thuhet në një përgjigje për Gazetën Demos nga dega e LDK-së në Podujevë.
Tutje ata u shprehën se kjo është bërë me qëllim që t’a dëmtojnë takimin e tyre me mërgatën.
“Ne besojmë se kjo është bërë me qëllim. Komuna kishte planifikuar një koncert për datën 3 gusht, të cilin e anuluan duke pretenduar se ishte për shkak të motit të keq. Më pas, ata vendosën ta mbajnë koncertin më 5 gusht, duke e shfrytëzuar influencën e këngëtarëve të njohur për të tërhequr vëmendjen. Kjo është bërë me qëllimin që ta dëmtojnë takimin tonë. Këto koncerte po shfrytëzohen për të bërë fushatë nga kryetari komunes z. Bulliqi”, thuhet më tutje në përgjigje.
Ata thanë se nuk kanë qenë të njoftuar më parë se manifestimi i Komunës do të jetë po të njëjtën ditë me ta.
Mirëpo, drejtoresha për Kulturë, Rini dhe Sport në Komunën e Podujevës, Vlora Humolli, tha për Gazetën Demos, se nuk ka pasur asnjë qëllim, lënia e koncertit në ditën që LDK-ja e ka ndejën e saj me mërgatën.
“Nuk ka pasur asnjë inati politik dhe se nuk e kemi ditur fare se partia në fjalë (LDK) ka pasur diçka të tillë në të njëjtën ditë”, tha ajo për Gazetën Demos.
Koncerte dhe ndeja me mërgimtarët organizohen edhe në komunat tjera të vendit, ku përformojnë këngëtarë të zhanreve të ndryshme të vendit.
