Curry e James shkëlqejnë – Amerika fiton kundër Serbisë në basketball

Shtetet e Bashkuara të Amerikës me përmbysje të madhe kanë arritur ta mposhtin Serbinë në gjysmëfinale të Lojërave Olimpike Paris 2024, kështu duke siguruar një medalje dhe për të kaluar në finalen e madhe.

Serbia ndonëse nuk ishte favorite shkaktoi shumë probleme dhe kishte epërsinë deri në minutat e fundit të takimit, por yjet e Amerikës e treguan veten në fund.

Çereku i parë i takoi serbëve, të cilët fituan me tetë pikë epërsi 31:23, pasi ishin në formë në gjuajtjet për tre pikë.

Edhe në 10 minutat në vazhdim ata fituan, për të shkuar në pushim me epërsi prej 11 pikëve apo rezultat 54:43.

Çereku i tretë filloi më mirë për ShBA-të që arritën të ulnin diferencën, por në fund të kësaj periode serbët përsëri ia dolën ta rrisnin epërsinë, për të shkuar në 10 minutat e fundit me 13 pikë epërsi.

10 minutat e çerekut të katërt ishin vendimtare. Yjet e Amerikës ia dolën ta bënin përmbysjen e madhe, duke qenë bindshëm më të mirë dhe për të fituar çerekun me 17 pikë epërsi apo 32:15.

Në fund ShBA-të iu gëzuan triumfit me rezultat 95:91, kështu duke e mposhtur Serbinë dhe për të kaluar në finale të Lojërave Olimpike.

Padyshim më i miri te Amerika ishte Steph Curry, i cili shënoi 36 pikë, ndërsa ndihmë të madhe dha LeBron James me dyshifror të trefishtë, e Joel Embiid me 19 pikë.

Në anën tjetër shifra dyshifrore te Serbia patën Bogdanovic, Jokic dhe Avramovic.

Në finale do të takohet me nikoqirët e Lojërave Olimpike, Francën, me ndeshjen që zhvillohet më 10 gusht me fillim nga ora 21:30.