Vjehrra me djalin e bëjnë llom nusen
Numri i rasteve të dhunës në familje në vendin tonë ka marrë përmasa shqetësuese. Çdo ditë raportohen raste ku viktima zakonisht janë gratë dhe vajzat që përjetojnë dhune psikike e fizike nga bashkëshortët e tyre dhe anëtarët tjerë të familjes, raporton Gazeta Sinjali. Një rast i tillë ka ndodhur në një shtëpi në rrugën “UÇK” në Gjakovë, ku një burrë bashkë me nënën dyshohet se ka sulmuar fizikisht bashkëshorten e tij.
Sinjali mëson se rastin e ka denoncuar gruaja, e cila ka dhënë detaje për dhunën që ka përjetuar nga burri dhe vjehrra e saj, që e rrahën brutalisht, duke iu shkaktuar lëndime trupore.
Për motive ende të panjohura, ata e kanë goditur viktimën, njëri me rrip e tjetri me shuplaka. Përballë kësaj situate, ajo ka vendosur të kërkojë ndihmë nga Policia duke e raportuar rastin.
Denoncimi i viktimës ka aktivizuar Policinë, me ç’rast kanë arrestuar dhe shoqëruar në stacion policor të dyshuarit. Burri i dyshuar është dërguar në mbajtje për 48 orë, kurse nëna e tij është liruar.
