Kusari-Lila: VV-ja në zgjedhjet e ardhshme do t’i fitojë 50%

Shefja e deputetëve të Lëvizjes Vetëvendosje, Mimoza Kusari-Lila, ka thënë se shanset për zgjedhjet të parakohshme kanë humbur.

Kusari-Lila tha se çdo rrethanë, koha e zgjedhjeve të parakohshme do të çonte përafërsisht në kohën kur pritet të mbahen zgjedhjet e rregullta.

“Besoj që tashmë çdo ditë dhe çdo javë tutje humben shanset që të mbahen zgjedhjet e parakohshme. Në aspektin e afateve i vetmi afat që mund të konsiderohet për zgjedhje të parakohshme përmbajtësisht është shpërndarja e Kuvendit, për të cilën nuk ka pasur vullnet asnjëherë”.

“Në të gjitha rrethanat tjera sa i përket afateve apo mënyrave të tjera qoftë me dorëheqje që kërkon një parti opozitare apo me rrëzimin e Qeverisë që kërkon partia tjetër opozitare, prapë do të kishte procedura të tjera të cilat në realitet do të dërgonin datën e zgjedhjeve aty se ku është aktualisht data e zgjedhjeve e rregullta”.

“Duhet të fokusohemi të gjithë në punën që ka mbetur në pjesën e dytë të vitit, si Kuvend në sesionin vjeshtor ndërsa natyrisht edhe ekzekutivi me projektet e veta kapitale në fund edhe punë të tjera të ekzekutivit. Njëkohësisht të përgatitemi që zgjedhjet do të ndodhin në muajin e dytë, parimisht po e them, të vitit të ardhshëm”, tha ajo për EO, transmeton Klankosova.tv.

Ajo foli edhe për fituesin e zgjedhjeve, ku tha se Lëvizja Vetëvendosje do të jenë në nivelin e viti 2021, 50 për qind e më shumë.

“Besoj që sondazhet dhe disponimi tregon se në të njëjta shifra do të jetë edhe në këtë mandat Lëvizja Vetëvendosje, në bazë të të gjitha vlerësimeve apo matjeve që janë bërë në Kosovë pa diasporën, shto këtu faktin dhe pjesëmarrja e diasporës. Mendoj që Lëvizja Vetëvendosje do të jetë në statistikat e njëjta të vitit 2021, në nivelin e 50 përqindëshit apo më shumë”, tha ajo.