Lëndohet një qytetar gjatë kërcimit nga ura në Liqenin e Ujmanit

Një qytetar është lënduar teksa ka kërcyer nga ura në Liqenin e Ujmanit, sot, më 12.08.2024.

Lajmin e ka konfirmuar zëvendësdrejtori i Policisë për Rajonin Mitrovicë-Veriu, Veton Elshani.

“Duke kërcy, ka rrëshqitur me kokë në gurë”,  tha shkurt Elshani.

I lënduari është dërguar në Spitalin e Mitrovicës, ndërkaq më pas është dërguar për në QKUK.

Ndërkaq, kryetari i Zubin Potokut, Izmir Zeqiri, përmes një postimi në Facebook, ka shprehur keqardhje për rastin.

“Sot pata kënaqësi të takoj qytetarë të shumtë duke u larë dhe pushuar tek liqeni i Ujmanit. Por ndjeva keqardhje që një qytetar ishte lënduar duke kërcyer në ujë me çka i uroj shërim të shpejt”, ka shkruar Zeqiri.

Gjatë mesit të korrikut pas temperaturave të larta, dhjetra qytetarë kanë zgjedhur Liqenin e Ujmanit për t’u freskuar.

Për arsye sigurie, Policia e Kosovës, në mënyrë të vazhdueshme patrullon në atë pjesë./Telegrafi/