FFK kërkon mbi 23 mijë euro nga emisionet sportive për të lejuar transmetimin e ‘highlights’
Federata e Futbollit të Kosovës (FFK) tani është duke kërkuar para nga emisionet sportive, në mënyrë që t’ua lejojë transmetimin e sekuencave të shkurtëra, që ndryshe njihen si “highlights” nga ndeshjet e Superligës, Ligës së Parë dhe Kupës së Kosovës.
Emisionet sportive nëpër televizione në vitet e fundit i kanë publikuar pa pagesë golat, asistimet, apo edhe vendimet e dyshimta të ndeshjeve së Superligës të Kosovës (apo edhe me marrëveshje me transmetuesin).
Megjithatë, një situatë e tillë tashmë ka ndryshuar. FFK iu ka dërguar email televizioneve të mëdha lokale, duke iu kërkuar para për t’ua lejuar këto transmetime.
Sipas dokumentit që ka siguruar Gazeta Nacionale, FFK ka kërkuar 12 mijë e 600 euro për sekuencën 60 sekondëshe të ndeshjeve, ndërsa 23 mijë e 400 euro për një sekuencë katër minutëshe.
“Sekuencat do të shiten në dy paketa:
A. Sekuenca audiovizive (highlights) me kohëzgjatje deri në 60 sekonda për çdo ndeshje për emisione informative, lajmesh me vlerë 12 mijë e 600 euro në sezon.
B. Sekuenca audiovizive (highlights) me kohëzgjatje deri në 4 (katër) minuta për çdo ndeshje për programe televizive me vlerë 23 mijë e 400 euro në sezon”, thuhet ndër të tjera në kërkesën e FFK-së.
