Zyrtarizohet kandidatura e parë për deputet, është kryetar komune

Kryetari i AAK-së, Ramush Haradinaj ka qëndruar në Rahovec ku është pritur në takim nga kryetari i kësaj komune, Smajl Latifi.

Më këtë rast, Haradinaj ka bërë më dije se kryetari i Rahovecit do të jetë një prej kanidatëve për deputet në listën e AAK-së për zgjedhjet e përgjithshmë të 9 shkurtit.

Më poshtë postimi i tij:

Komuna e Rahovecit me kryetar Smajl Latifin, sot është renditur në majen e komunave të suksesshme. Vet Smajli, model i një kryetari të mirë e me performancë të shkëlqyer, e ka renditur komunën që e udhëheq, të paren për sa i përket transparencës dhe llogaridhënies.

Rahoveci i verës dhe i rrushit, është shndërruar edhe në një atraksion turistik, në qytet të festivaleve e aktiviteteve kulturore, duke arritur që njëri prej tyre, “Hardhfesti’ që mbahet në çdo fillim shtatori, të bëhet ndër më të rëndësishmit në nivel Kosove.

Në fillim të vizitës sime në Rahovec, nga kryetari Latifi dhe ekipi i tij i mrekullueshem, u informova për projektet zhvillimore në komunë, si dhe për sfidat aspak të lehta, me të cilat po përballen ata, kryesisht për shkak të obstruksioneve nga qeveria qendrore.

Me Smajlin kemi rrugëtuar bashkë, edhe në të gjitha fazat e lirisë dhe shtetndërtimit, edhe në kohë të vështira.

Smajl Latifi do të jetë edhe njëri prej kandidatëve më të vlerësuar për deputet në listën e Aleancës, në zgjedhjet e përgjithshme të 9 shkurtit.