“Cilësi e dobët e materialit”, punëtorët ankohen për punimet në rrugën Podujevë – Prishtinë

Rruga për Podujevë që ka nisur të ndërtohet para shtatë vjetësh, pritet të përfundojë brenda 425 ditëve. 

Ministri i Mjedisit, Planifikimit Hapësinor dhe Infrastrukturës, Liburn Aliu, bashkë me zëvendësministrin Hysen Durmishi, javë më parë vëzhguan punimet që po bëhen në rrugën Prishtinë-Podujevë.

Aliu e ka quajtur këtë një prej projekteve më të rëndësishme infrastrukturore në vend, derisa ka thënë se punimet po avancojnë.

E ndërkohë që nga Qeveria thonë se kjo rrugë do të përfundojë në fund të këtij viti, punëtorë të angazhuar në këto punime janë skeptikë se një gjë e tillë do të ndodhë, shkruan Gazeta Sinjali.

Kjo për faktin se ka ankesa të shumta për mënyrën jo të duhur të të punuarit.

Një punëtor është deklaruar për Sinjalin lidhur me këtë, teksa ka thënë se problem është cilësia e dobët e materialit.

“Tu i pa punimet që janë tu u bo, s’ma merr menja kryhet rruga deri në fund të vitit”, shtoi ai.

Ai ftoi mediat që të vijnë më shpesh dhe t’i shohin punimet që po bëhen.

“S’po punohet me kualitet. Janë t’u punu shumë dobtë, dobët është punu materiali. Nuk i shtrojnë ato tepihat që duhet, nuk e bëjnë ngjeshjen si duhet. Nëse hyn me kamion edhe e qet zhavorin, ajo sharron, çfarë punë është kjo. Si të sharron kamioni dihet qe ajo nuk është e ngjeshne mirë, veç punohet shkel e shko”, tha ai për Sinjalin.

Ndryshe, Kryeministri Albin Kurti ka premtuar se sivjet do të pëfundohen rrugët që ka vite që kanë filluar së ndërtuari, përfshirë edhe kjo Prishtinë-Podujevë.

“Sa i përket infrastrukturës rrugore, vitin 2024 do të jetë vit i përfundimit të disa projekteve të vjetra dhe fillimi i disa të reja. Autostrada Prishtinë-Gjilan dhe rrugët Prishtinë-Podujevë, Prishtinë-Mitrovicë, Dollc-Gjakovë, e Drenas-Skenderaj pritet të finalizohen sivjet”, kishte deklaruar Kurti në një mbledhje të Qeverisë, në fillim të vitit.