Pas gjobës 20 mijë euro, KESCO shpërndanë 700 mijë fatura në zarfe

KESCO ka njoftuar se po shpërndan faturat e energjisë elektrike te konsumatorëve në zarfe, ashtu siç e parasheh edhe vendimi i fundit nga Agjencia për Informim dhe Privatësi.

Me anë të një kumtese për media bëhet e ditur se ky projekt, i cili ka filluar së implementuari si pilot projekt që nga muaji maj i këtij viti në disa lokalitete në formë të pilot projektit, pastaj nga 22 qershori i këtij viti, pilot projekti u zgjerua në të gjitha distriktet në lokalite të caktuara, për të filluar me komplet konsumatorët në muajin gusht.

“Kjo formë e re e shpërndarjes së faturave pa dyshim që po has në shumë vështirësi për ta implementuar në plotni. Një nga pengesat kryesore është mungesa e kutive postare, mungesa e adresave dhe numri identifikues i shtëpive apo objekteve banesore. Këto po e vështirësojnë tej mase procesin e dorëzimit të faturave”, thuhet në kumtesën për media të KESCO-s.

Më tej theksohet se futja në zarfe e të gjitha faturave, përpos pengesave në terren, po ngadalëson edhe komplet procesin e leximit dhe faturimit.

Të gjitha këto rrethana, sipas KESCO-s, e bëjnë të domosdoshme marrjen në konsideratë të ndonjë alternative tjetër, ku esencial do të ishte bashkëpunimi ndërinstitucional që të gjendet zgjidhja sa më e mirë dhe sa më efikase, benefitet e të cilave do t’i korrnin konsumatorët fundor.

“KESCO ka mbi 700 mijë konsumatorë anekënd Kosovës, dhe çështjet operacionale, sidomos në vende rurale, e vështirësojnë edhe më tepër realizimin e këtij projekti. Kemi shqyrtuar edhe organizimin e dërgesave postare, por që nuk janë unike për të gjithë dhe nuk krijojnë mundësi veprimi për të gjithë konsumatorët fundorë”, thuhet tutje në njoftim.

Ditë më parë, kjo kompani ishte dënuar me 20 mijë euro nga Agjencia për Informim dhe Privatësi për shkelje të privatësisë së konsumatorëve.