Gjest i jashtëzakonshëm: Merita dhe Zeqiri ecën 6 kilometra për ta shpëtuar jetën e një personi

Infermierja Merita Hamdi Ferati dhe shoferi Zeqir Halili bënë një punë të jashtëzakonshme për të shpëtuar jetën e një 21-vjeçari të plagosur.

Të dy ecën mbi 6 kilometra në këmbë nëpër kodrat e Sllakovcit, pasi rruga ishte e pakalueshme, për të mbërritur te pacienti.

Shoferi Zeqir Halili arriti gjithashtu të sigurojë një traktor për të shpejtuar mbërritjen te i riu.

Me shumë përpjekje, arritën te pacienti dhe menjëherë i dhanë ndihmën e parë.

Pacientit iu rikthye vetëdija, plaga iu fashua dhe iu dha terapia e nevojshme, gjë që stabilizoi gjendjen e tij.

Policia e Kosovës, në bashkëpunim me shoferin, ndihmoi për transportimin e pacientit nga zona e lartë deri në fshatin Sllakovc, ku më pas u transferua në Spitalin e Vushtrrisë.

Kjo ishte një punë e madhe, me lodhje dhe përpjekje të jashtëzakonshme, por gjithçka u bë për të shpëtuar jetën e 21-vjeçarit.

Falë ndërhyrjes së shpejtë të Policisë së Vushtrrisë dhe përkushtimit të infermieres Merita Hamdi Ferati dhe shoferit Zeqir Halili, djali tani është jashtë rrezikut për jetën. Kujdestari në ndërrimin e natës në Urgjencën e Vushtrrisë ishte Dr. Butrint Avdiu.