Ngritet aktakuzë për sulmin terrorist të Banjskës (VIDEO)
Pak ditë para se të bëhet një vit që nga sulmi i Banjskës, Prokuroria Speciale e Kosovës ka ngritur aktakuzë për sulmin terrorist të Banjskës.
Kështu ka bërë të ditur kryeprokurori i Prokurorisë Speciale të Kosovës, Blerim Isufi në një konferencë për media, i cili njoftoi se aktakuzë është ngritur ndaj 45 të pandehurve të përfshirë në këtë rast, njofton Klankosova.tv.
“Pas përfundimit të hetimit, pas grumbullimit të të gjitha provave, sot kemi ngritur aktakuzë në Gjykatën Themelore në Prishtinë, në Departamentin Special kundër 45 të pandehurve të përfshirë në këtë rast”.
“Për 45 të pandehurit ekizston dyshimi i bazuar mirë se kanë kryer vepra penale që ndërlidhen me terrorizmin, konkretisht vepra penale kudër rendit kushtetues dhe sigurisë së Republikës së Kosovës, financimi i terrorizmit dhe shpërlarjes së parave”, është shprehur ai, njofton Klankosova.
Isufi tha gjithashtu se pranim i rezultateve të ekzaminimeve, sipas tij, ishte shkaku kryesor i vonesës së kësaj aktakuze.
“Pranim i rezultateve të ekzaminimeve të cilat janë kryer jashtë vendit, ishte ndoshta shkaku kryesor i vonesës së kësaj aktakuze. Pasi kemi pranuar këto raporte, sot Prokuroria Speciale brenda afatit ligjor ka ngritur aktakuzën për këtë rast, pra ku janë akuzuar 45 persona”, tha tutje kryeprokurori Isufi.
