Abdixhiku: Kujtojmë dhe solidarizohemi me familjet e viktimave të 11 shtatorit

Në 23 vjetorin e sulmit tragjik mbi kullat binjake në ShBA, Kryetari i Lidhjes Demokratike të Kosovës, Lumir Abdixhiku, ka dhënë një mesazh të fortë për të nderuar viktimat dhe për të theksuar lidhjen e fortë midis Kosovës dhe Amerikës.

“Sulmi mbi Kullat Binjake në New York, në mëngjesin e 11 shtatorit të vitit 2001 i cili mori jetën e rreth 3000 njerëzve të pafajshëm, tmerroi botën”, deklaroi Abdixhiku. “Kjo tragjedi, nuk ishte thjesht një akt dhune, por një sulm mbi vlerat e lirisë, demokracisë dhe bashkëjetesës që ndajnë vendet demokratike anembanë botës”, shtoi ai.

I pari i LDK-së theksoi se ky akt terrorist dhe barbar ishte një sulm direkt jo vetëm për Shtetet e Bashkuara, por për gjithë botën perëndimore dhe vlerat demokratike që ajo përfaqëson. Abdixhiku gjithashtu shprehu solidaritetin e Kosovës me familjarët e viktimave, duke e cilësuar këtë tragjedi si një akt të tmerrshëm nga mania radikale.

“Kosova do të mbetet gjithmonë krah për krah me Shtetet e Bashkuara të Amerikës, duke mbrojtur lirinë, paqen dhe demokracinë si vlera të përbashkëta të dy popujve tanë!”, përfundoi Abdixhiku, duke riafirmuar angazhimin e vendit për të ruajtur dhe promovuar këto vlera të rëndësishme.