LDK mohon tentim sulmin ndaj kryetarit Bulliqi

Lëvizja Vetëvendosje (LVV) në Podujevë përmes një reagimi tha se asamblisti i Lidhjes Demokratike të Kosovës në këtë komunë, Ekrem Rrahmani, në seancën e sotme të Kuvendit Komunal, ka tentuar ta sulmojë fizikisht kryetarin e Podujevës, Shpejtim Bulliqin, raporton Sinjali.

Sipas VV-së në Podujevë, e gjitha ndodhi pas një debati të gjatë për zëvendësimin e anëtarit të Komitetit për Komunitete, Demokrat Hodolli – ku edhe nis me ofendime ndërmjet dyshes Bulliqi – Rrahmani.

“Këshilltari Hodollli kohë më parë e ka deklaruar daljen nga Grupi i LDK-së, po nuk ka hequr dorë edhe nga partia e tij. Duke qenë kështu, ai ka vazhduar të jetë anëtar i Komitetit për Komunitete. Por, kërkesa shumë meskine e LDK-së ishte që Hodolli të zëvendësohet me një anëtar tjetër të tyre, gjë që edhe u hodh në votim nga kryesuesi, por që nuk i mori votat e mjaftueshme”, u tha fillimisht në reagimin e VV-së.

VV gjithashtu e ka akuzuar Rrahmanin se ai eskaloi në fyrje ndaj kryetarit dhe se pas debatit shkoi te foltorja për ta sulmuar atë.

“Meqenëse dështoi propozimi i tyre, Kryetari Bulliqi për t’i dhënë zgjidhje kësaj kërkese, propozoi që për këtë çështje të kërkojnë përgjigje nga MAPL-ja se si të veprojnë rreth anëtarit të Komitetit për Komunitete. As kjo nuk u mjaftoi dhe Ekrem Rrahmani, eskaloi në fyerje ndaj Kryetarit dhe këshilltarët e LDK-së e penguan edhe rrjedhën e seancës. Ndërkohë, Ekrem Rrahmani shkoi në foltore për ta sulmuar Kryetarin Bulliqi”, thuhet në reagimin e VV-së në Podujevë.

Ndërkaq, Lidhja Demokratike e Kosovës (LDK) e ka mohuar dhe ka hedhur poshtë këto pretendime të VV-së që asamblisti i tyre ka tentuar të konfrontohet fizikisht me kryetarin Bulliqi.

LDK thotë se janë pamjet e filmuara ku tregojnë qartë se asamblisti i tyre për asnjë moment nuk u konfrontua fizikisht me Bulliqin.

“Ofendimet që LVV ka shpërndarë përmes një komunikate, duke i quajtur “rrugaçë” asamblistët tanë, tregojnë për nivelin dhe për shpifjet e tyre. Siç edhe dihet, seancat e Kuvendit transmetohen drejtpërdrejt përmes TV Llapi dhe salla e Kuvendit është e mbuluar me kamera. Pamjet flasin qartë se asamblisti Rrahmani në asnjë moment nuk e ka prekur fizikisht Bulliqin”, thuhet ndër të tjera në reagimin e LDK.

Tutje aty thuhet se seanca është mbajtur jashtëligjshëm, për çka LDK ka thënë se do ta kontestojnë në MAPL.