Borë në viset malore të Kosovës
Mot i vranët dhe me shi është duke mbizotëruar në vendin tonë, e mot i ngjashëm pritet të mbajë deri në fund të muajit.
Përveç reshjeve të shiut, në vise malore ka filluar të ketë edhe reshje bore, transmeton Telegrafi.
Shërbimi i Kërkim-Shpëtimit Malor i Kosovës sot përmes një reagimi publik ka kërkuar nga qytetarët të kenë kujdes pasi në male janë krijuar kushte dimërore ku edhe ka reshje bore.
“Ditëve të fundit rajoni ynë është përfshirë nga të reshura të dendura, ku nëpër male janë krijuar kushte dimërore dhe lartësitë mbidetare mbi 2000 metra kemi reshje bore. Nëse keni bërë plane për të zhvilluar aktivitete në këto ditë, ju lusim të keni veshmbathje adekuate për ecje dimërore dhe gjitha pajisjet dimërore me vete dhe po ashtu të planifikoni mirë rrugëtimin tuaj”, thuhet në reagimin e tyre.
