Abdixhiku akuzon VV-në se tentoi ta ndërprejë mësimin tërëditor

Kryetari i Lidhjes Demokratike të Kosovës, Lumir Abdixhiku ka deklaruar se Vetëvendosja është pozicionuar kundër mësimit gjithë-ditor në shkollat e Prishtinës, madje sipas tij, një asamblist i LVV-së në Komunën e Prishtinës ka thënë se ‘mësimi gjithë-ditor është për nënat dembelica’.

Abdixhiku, kandidat i LDK-së për kryeministër, ka thënë se Vetëvendosja është munduar të ndërprejë këtë reformë që po realizohet në pesë shkolla të Prishtinës përmes një rregulloreje.

Kështu u shpreh Abdixhiku në një intervistë për “KallxoPërnime”, teksa foli për ambiciet e tij në arsim nëse arrinë të bëhet kryeministër i vendit në zgjedhjet e 9 shkurtit 2025.

“Në emër të grupit që me pengu reformën, ka thënë mësimi gjithëditor është për nënat dembelica. Merre me mend ti. As konceptin bazik nuk kanë”- u shpreh Abdixhiku në intevristë më 21.09.2024.

Programi mësimor tërëditor për pesë shkollat fillore në kryeqytet po zbatohet që nga shtatori i këtij viti në shkollat:“ Xhemail Mustafa”, “Faik Konica”, “Shkolla e Gjelbër”, “Nazim Gafurri” dhe “Qamil Batalli”.

Se si planifikon ai ta rehatojë arsimin në Kosovë nëse veç del fitimtar nga zgjedhjet, Abdixhiku tha se modeli më i mirë është ky i drejtoreshës së Arsimit, Jehona Lushaku në pesë shkollat e kryeqytetit. E, të njëjën reformë që ai e quan investim patriotik, sipas tij, do ta bëjnë edhe në pesë komuna të Kosovës, duke premtuar se nuk do të bëjë dallime se nga cilat parti udhëhiqen ato komuna.

Kreu i LDK-së tha se fëmijët në Kosovë janë tre vite mbrapa fëmijëve të Bashkimit Europian.

“Një fëmijë i Kosovës në klasë të pestë ka dijen dhe inteligjencën ose të arriturat e një fëmiu të klasës së dytë në Bashkimin Europian”- tha ai.

Sipas tij, modeli në komunat e Prishtinës është i duhuri për t’u ndjekur ngase ka ushqim të mirëfilltë, kuzhina nëpër shkolla, librat nëpër rafte. fëmijët jane të angazhuar deri në orën 16:00, dhe mbi të gjitha gratë do munden të aktivizohen më lehtë dhe më shumë në fuqinë punëtore.

Një tjetër ndryshim që Abdixhiku thotë se do ta bëj në arsim nëse bëhet shef i ekzekutivit, është që konkurset të bëhen në nivel nacional, pra që pikët testuese të vendosen publikisht dhe në një listë të caktuar ku janë krejt mësimdhënësit renditen.

“Hapet një vend i punës, ai që ka më së shumti pikë ai fiton vendin e punës”- tha ai.

Ndërkaq për çështjen e teksteve shkollore, Abdixhiku u shpreh se është dështim që një qeveri që ka pasur 51 për qind të votave dhe 12 miliardë euro buxhet, nuk ka arritur t’i sigurojë librat më 1 shtator.

Ai kritikoi mënyrën e subvencionimit të teksteve shkollore.

“Është teksti ma i shtrenjtë tash. Sepse ne e blejmë tash tekstin, ato subvencionohen prapë prej shtetit. E na i marrim pastaj për një cohë në vend të që t’i marrim për 300 mijë fëmijë, që i merr edhe ma lirë edhe ma mirë”- tha Abdixhiku.

Prindërit e nxënësve të klasave 1 – 5 në vitin shkollor 2024/2025, Ministria e Arsimit po i subvencionon me 80 euro për blerjen e librave dhe mjeteve mësimore.

Ndërsa, prindërit e nxënësve të klasave 6 – 9 në vitin shkollor 2024/2025, Ministria e Arsimit po i subvencionon me nga 110 euro për blerjen e librave dhe mjeteve mësimore.

Ministria e Arsimit i ka ndarë 20,418,670 euro për subvencionimin e blerjes së librave dhe mjeteve mësimore për vitin shkollor 2024/2025.

Në anën tjetër, Qeveria e Kosovës i ka dedikuar 13,875,138 euro për subvencionimin e blerjes së librave dhe mjeteve mësimore për vitin shkollor 2024/2025.