UEFA dënon Barcelonën – Pa tifozë në Beograd

Barcelonës do t’i ndalohet të shesë bileta për ndeshjen e ardhshme si mysafire në Ligën e Kampionëve, shkaku i sjelljeve raciste të tifozëve të saj në ndeshjen ndaj Monacos.

Barcelona është dënuar me gjobë prej 10 mijë eurosh dhe i është ndaluar të shesë bileta për ndeshjen e ardhshme si mysafire, që e luan ndaj Yllit të Kuq në Beograd.

Një pjesë e tifozëve të Barcelonës kishin shpalosur një baner me mbishkrimin “Heil Flick”, që në shqip përkthehet si “Përshëndetje”, një gjest që është i lidhur me konotacione naziste.

Dënimi është dhënë nga UEFA, me Barcelonën që edhe më herët ishte suspenduar për sjellje të tilla në takimin ndaj PSG-së në prill.

“Klubi njofton se do të pranojë këtë sanksion. Klubi po ashtu premton se do t’ia kthejë paratë atyre që tashmë kishin paguar për biletat e ndeshjes ndaj Yllit të Kuq”, shkruan Barcelona në një komunikatë zyrtare.

Klubi, me dijeni të këtyre sjelljeve, ka premtuar se do t’i shtrëngojë më shumë masat e rrepta dhe premton se këso ngjarje s’do të ndodhin më në të ardhmen.

UEFA ia ka shtuar edhe një dënim me kusht Barcelonës, i cili do të aktivizohet nëse klubi thyen rregullat edhe një herë brenda 12 muajve.