Kica-Xhelili për bisedën Kusari-Radoiçiq: Këta e kanë problem zbulimin se po koordinohen
Deputetja e LDK-së, Doarsa Kicaj-Xhelili ka komentuar publikimin e bisedës mes shefes së grupit parlamentar të VV-së, Mimoza Kusari dhe kriminelit Milan Radoiçiq.
Në audio-incizime, Kusari dëgjohet duke biseduar me Radoiçiqin dhe ish-deputetin Slavko Simiq.
“Eh – me Listën Serbe e paskan koordinuar kush zgjedhet gjyqtar e kush jo.Këta nuk e kanë problemin e koordinimit me Listen Serbe, e kanë me ZBULIMIN se po koordinohen. Koordinohen me ta për veteran, për pagë minimale, për gjyqtarë të Kushtetueses e kushedi çka tjetër që nuk është incizuar”, ka shkruar deputetja Kicaj Xhelili.
“Kosova e meriton një lider që ka tjetër vizion. Një që njihet që e mban fjalën, pavarësisht vështirësive. Një lider si Lumir Abdixhiku që nuk e fokuson krejt punën në kalkulime manovrash e brohoritjesh elektorale. Lider që i sheh qytetarët si bashkërrugëtues, e jo analfabetë. Një që ka ide të SAKTA zhvillimore, e që shpon përtej ambicieve të varfra që i ka instaluar kjo qeveri në mendjet e secilit”, ka shkruar deputetja.
