Hapet panairi me produkte ushqimore tradicionale në Podujevë

Në Bulevardin e Qytetit sot është hapur Panairi i radhës me produkte tradicionale e artizanale të ndryshme.

Për tre ditë me radhë, qytetarët e Podujevës do të mund të vizitojnë këtë panair, ku mund të gjejnë ushqime të ndryshme tradicionale, veshje kombëtare e artizanale të prodhuara kryesisht nga gratë e Llapit.

Në hapjen e panairit mori pjesë Drejtoresha e Drejtorisë së Bujqësisë, Pylltarisë dhe Zhvillimit Rural, Lirie Hoti, e cila theksoi rëndësinë e mbështetjes së prodhuesve lokalë të cilët ruajnë kulturën tradicionale. Hoti tha se këto prodhime ndikojnë edhe në zhvillimin ekonomik.

Ky panair është mbështetur nga Ministria e Bujqësisë, Pylltarisë dhe Zhvillimit Rural dhe ka për synim promovimin e traditave dhe prodhimeve vendore.

Panairi do të jetë i hapur tri ditë, deri më datën 12 shtator, duke ofruar një gamë të gjerë të produkteve të ndryshme ushqimore tradicionale, artizanale, etj., të përgatitura nga gratë.