Nesër seancë e jashtëzakonshme, diskutohet për bisedën mes Kusari-Lilës dhe Radoiçiq

“Në emër të 42 deputetëve, sapo dorëzova në Kuvend kërkesën për Seancë të Jashtëzakonshme për ditën e nesërme nga ora 12:00, lidhur me urgjencën që përfshinë sigurinë dhe kredibilitetin e kësaj Republike, për të kuptuar se sa thellë e ka përfshirë ky pushtet, terroristin Milan Radojçiq, në diktimin e agjendës së Kuvendit të Kosovës”, ka njoftuar ai.

Kërkesa e Tahirit ka ardhur pasi sot dështoi nisma e opozitës për të diskutuar për audio-incizimet e Shefes së Grupit Parlamentar të VV-së, Mimoza Kusari-Lila me ish-nënkryetarin e Listës Srpska, Milan Radoiçiq, i cili është i akuzuar për sulmin terrorist në Banjskë.

Tahiri theksoi se është skandaloze që një individ me një të kluar të tillë të jetë në gjendje të diktojë agjendën e Kuvendit të Kosovës.

“Ky turp nga rrafshi moral dhe ky degradim nga rrafshi institucional, nuk mund të kalojë pa përgjigje,” tha ai.
Tahiri i ka bërë thirrje Kusari-Lilës të ofrojë dëshmitë lidhur me pretendimet e saj se në shtëpinë e Radoiçiqit kishin shkuar zyrtarë të Kosovës dhe i kishin dërguar dhurata.

“Populli nuk meriton mjegull. Prandaj, e ftoj zonjën Kusari që nesër, para seancës në konferencë për media, apo gjatë seancës, t’i publikojë këto fotografi një për një” , ka shtuar ai.