E pazakontë: FFK-ja ankohet në UEFA për Arlind Sadikun

Menaxhimi me Federatën e Futbollit të Kosovës nuk po i shkon aspak mirë Agim Ademit. Dështimi me Kosovën në futboll ka bërë që Ademi të jetë i kritikuar nga mediat e gazetarët kosovarë.

Kjo nuk po i pëlqen aspak të parit të Federatës së Futbollit, i cili ka vendosur të ‘hakmerret’ ndaj kritikuesëve të tij.

Së fundi rasti ka ndodhur me drejtorin e futbollit të ArtMotion, Arlind Sadikun, i cili nuk u akreditua për ndeshjen Kosovë – Qipro, ndeshje kjo e cila u zhvillua në stadiumin ‘Fadil Vokrri’, në Prishtinë.

Sadiku me anë të një postimi ka treguar që FFK-ja është ankuar në UEFA për të. Për Sadikun në UEFA ishte ankuar edhe një Federatë tjetër, ajo e Serbisë, për shkak të ‘shqiponjes’ në stadium.

Sadiku njihet si njëri nga gazetarët më të drejtpërdrejt dhe nuk frikësohet t’i shfaqë dështimet e FFK-së, e kjo gjë si duket i ka penguar Agim Ademit.

Më poshtë postimi i Sadikut i cili e tregon gjithë situatën:

ReAgim

Pamje nga ndeshja e parë e Kosovës kundër Haitit në mars të vitit 2014

Prej asaj kohe, në të gjitha ndeshjet e Kosovës në shtëpi, kam qenë në detyrë, duke qenë i akredituar nga UEFA (se sa për FFK-në, do të isha në shtëpi gjatë këtyre viteve).

Për herë të parë pas më shumë se 10 vitesh, dje nuk punova në “Fadil Vokrri”.

UEFA nuk ma dha akreditimin, sepse ishte ankuar Federata e Futbollit tonë.

Në Euro 2024, u ankua zyrtarisht Federata e Serbisë, andaj ma hoqën akreditimin. Që e bëjnë veprimin e njejtë edhe Federata jonë, nuk e kam besuar asnjëherë.

O’ të shkretë… mos k’qyrni me kriju një gogol të jashtëm kinse ai po ua shkakton problemet. Problemin e keni brenda.

O’ të shkretë… mos mendoni se mundeni me ma mbyllë gojën apo me më frikësu, se kot e keni.

O’ të shkretë… unë asnjëherë nuk kam ardhur t’iu bi në gjunjë e t’ju kërkoj falje dhe nuk do ta bëj asnjëherë.

O’ të shkretë… unë nuk do të ndalem, sepse liria e shprehjes është më e shtrenjtë se “buka e gojës”, të cilën ua jepni disave për t’ua “mbyllur gojën”.

Turpi ju mbuloftë.