Konfirmohet nisja e hetimeve ndaj Kajtazit dhe Mehmetajt
Prokuroria Themelore në Prishtinë ka nisur hetime penale ndaj dy gazetarëve Vehbi Kajtazi dhe Lirim Mehmetaj, ka konfirmuar Kryeprokurori i Prishtinës, Zejnullah Gashi.
Hetimi ndaj dy gazetarëve ndërlidhet me zbulimin e identitetit të zyrtarëve të Agjencisë së Kosovës për Inteligjencë, raporton Paparaci bazuar në burime brenda prokurorisë.
Kryeprokurori i Prokurorisë në Prishtinë, Zejnullah Gashi tha se rasti i është ndarë një prokurori.
“Po, kanë nisur hetimet. Rasti i është ndarë një prokurori”, ka thënë Gashi në një bisedë telefonike me Paparacin.
Lidhur me hetimet që po zhvillohen ndaj tij dhe gazetarit Lirim Mehmetaj, Kajtazi tha se rasti është iniciuar nga AKI-ja përmes një raporti që agjencia i ka dërguar ushtruesit të detyrës së Kryeprokurorit të Shtetit, Besim Kelmendi.
“Kelmendi, këtë shkresë që kërkohet burgim për mua dhe Lirimin, ia ka dorëzuar Prokurorisë Themelore në Prishtinë”, tha Kajtazi në një shkrim në rrjetin social ‘Facebook’ të martën.
Sipas Kajtazit, hetimi ndaj tij dhe Mehmetajt ndërlidhet me ekspozimin e implikimit të AKI-së në lajmin e mediumit me bazë në Bosnjë e Hercegovinë, Slobodna Bosna, i cili raportoi për gjoja financimin e dy portaleve kosovare nga Serbia.
