Të burgosurit në Gërdoc po ndihmojnë në lyerjen e mureve dhe shtrimin e dyshemesë

Në kuadër të aktiviteteve të punës së të burgosurve në institucionet korrektuese, në Burgun e Sigurisë së Lartë, të burgosurit janë angazhuar në përmirësimin e infrastrukturës së këtij institucioni.

Shërbimi Korrektues i Kosovës njofton se ata po marrin pjesë aktivisht në punimet që përfshijnë lyerjen e mureve dhe shtrimin e dyshemesë me epoksit.

“Ky projekt synon jo vetëm përmirësimin e kushteve të brendshme, por edhe nxitjen e të burgosurve për të zhvilluar aftësi pune dhe përgjegjshmëri, duke ndihmuar kështu në procesin e rehabilitimit të tyre”, ka njoftuar tutje SHKK.

Së fundmi është bërë miratimi i ligjit për SHKK-në me të cilin janë themeluar njësi të reja, si ato për Vlerësimin dhe Klasifikimin e të Burgosurve, për inteligjencë, njësia Ekonomike dhe themelimi i Institucionit për Trajtimin e Personave me Nevoja të Veçanta.

Në 11 burgje të Kosovës ndodhen gjithsej 1734 të burgosur, prej tyre 1120 të dënuar./Telegrafi/