Thaçi nesër përballet me aktakuzën e re për ndikim në dëshmitarë (VIDEO)

Gjykata Speciale ka ngritur dje aktakuzë të re ndaj ish-presidentit të vendit, Hashim Thaçit, pasi dyshohet se ai bashkë me Bashkim Smakajn, Isni Kilajn, Fadil Fazliun e Hajredin Kuçin, ndikuan në dëshmitarë.

Thaçi pritet që të dalë nesër në gjykatoren e Speciales për të treguar nëse ndihet apo jo fajtor apo jo për aktakuzën e re, pasi tri herë të tjera ishte ngritur dhe ishte deklaruar i pafajshëm për akuzat për krime lufte dhe krime kundër njerëzimit.

Gazetarja e Klan Kosovës, Rina Mujku, e cila gjendet në Hagë, tha në “Info Magazine” se i pari që do të del në gjykatore do të jetë pikërisht Thaçi, me fillim nga ora 09:30, dhe sipas saj, paraqitja e Thaçit pritet të zgjasë prej 45 minuta deri në një orë.

“Për dallim nga këta të katër, të hënën do të dalë në gjykatore Hajredin Kuçi, pasi ndaj tij s’ka fletëarrest por vetëm fletëthirrje për t’u paraqitur në Dhomat e Specializuara pasi në të gjitha përgjimet që janë bërë mes treshes së UÇK-së, pasi aty nuk përfshihet Jakup Krasniqi, Hajredin Kuçi, del të ketë folur me Hashim Thaçin, për dëshmitarët, por nuk i janë gjetur dokumente në lidhje me dëshmitarë”, tha Mujku.

Në aktakuzën e Speciales thuhet se Thaçi “u dha zotit Smakaj, zotit Kilaj, zotit Fazliu dhe zotit Kuçi informacion konfidencial në lidhje me dëshmitarë të ZPS-së, udhëzime për të ndikuar në dëshmitë e dëshmitarëve të ZPS-së dhe hollësi se si duhej ta bënin këtë”.