Pamje ekskluzive: Njerëzit e pushtetit në asamblenë e Prishtinës, dyshohen për presion ndaj asamblistëve të VV-së

Asamblistët e komunës së Prishtinës sot e kanë votuar buxhetin për vitin 2025, raporton Gazeta Sinjali.

Por, ky buxhet duket se nuk është dashur të kalojë sipas shumicës së asamblistëve të Lëvizjes Vetëvendosje.

Madje për t’i ndihmuar këta të fundit në presionin ndaj asamblistëve të partisë së tyre, në kuvendin e Prishtinës kanë zbarkuar edhe shefa kabinetesh dhe këshilltarë të qeverisë së Albin Kurtit.

Sipas disa pamjeve ekskluzive të siguruara nga Gazeta Sinjali, në Asamblenë e Prishtinës, shihet Ilir Kërçeli, shefi i kabinetit të Glauk Konjufcës, Berita Abazi, këshilltare e Albulena Haxhiut dhe Egzon Azemi, shef i kabinetit të Arben Vitisë.

Të njëjtit dyshohet se kanë bërë presion Edmond Azemit dhe Berat Lahut për të mos e votuar buxhetin e vitit 2025.

Por, pavarësisht kësaj buxheti ka kaluar – pro tij kanë votuar edhe Azemi dhe Lahu – fakt ky që duket se e ka nervozuar asamblistin e VV-së në komunën e Prishtinës, Gëzim Sveçlën.

Në një video që është publikuar, ai shihet duke demoluar pajisjet në sallën e mbledhjeve në Komunën e Prishtinës.

Gëzim Sveçla, e ka arsyetuar veprimin e bërë sot në sallën e Kuvendit Komunal, ku e shkuli mikrofonin, duke thënë se kjo ka qenë arsyeja e një veprimi të tillë, të cilin ai e ka quajtur “aksion simbolik”.

Në një konferencë për media të mbajtur pas seancës së mbajtur për miratimin e buxhetit 2025 për Komunën e Prishtinës, Sveçla ka kërkuar falje për, siç ka thënë, defunksionalizim të mikrofonit, duke thënë se një veprim i tillë nuk është bërë për miratim të buxhetit, por për disa vendime që do të merreshin në seancë e që sipas tij, janë në dëm të qytetit.

“Rasti që ka ndodhur nuk ka të bëjë fare me miratimit e buxhetit. Unë si asamblist e kam ndërmarr një veprim që e keni parë të gjithë. Bëhet fjalë për defunksionalizimin e mikrofonit që për një kohë shumë të shkurtër u funksionalizua sërish. Nuk bëhet fjalë për vandalizëm të sallës së Kuvendit, bëhet fjalë për veprim politik, aksion simbolik që ishte i domosdoshëm në mënyrë që të paktën përkohësisht të ndërpritej ajo seancë ku do të merreshin disa vendime që janë shumë të dëmshme për qytetin dhe banorët e Prishtinës”, ka thënë Sveçla.

Aktin e ka dënuar edhe komuna e Prishtinës.