“E Shtuna me Programim” – Trajnime për të rinjtë në Podujevë

Në kuadër të mbështetjes së zhvillimit të teknologjisë dhe aftësive digjitale te të rinjtë, po organizohet një projekt inovativ dhe shumë domethënës i quajtur “E Shtuna me Programim”, i cili mbështetet nga Komuna e Podujevës.

Ky projekt ka për qëllim të ofrojë trajnime në fushën e programimit për nxënësit e shkollave të mesme të ulëta në Podujevë, duke ndihmuar kështu në zhvillimin e aftësive praktike dhe përgatitjen e tyre për të ardhmen digjitale.

Trajnimet zhvillohen çdo të shtunë dhe janë organizuar me shumë pasion nga dy të rinj, Elma Kiçmari dhe Olti Maloku, të cilët në moshën 16-vjeçare po japin shembull të shkëlqyer të iniciativës dhe përkushtimit për komunitetin.

Projekti synon jo vetëm të mësojë bazat e programimit, por edhe të frymëzojë të rinjtë për të ndjekur rrugën e inovacionit dhe teknologjisë si një fushë kyçe për të ardhmen.

Përmes mbështetjes së Komunës së Podujevës, projekti “E Shtuna me Programim” është një mundësi e artë për nxënësit që të përfshihen në botën e teknologjisë dhe të eksplorojnë talentet e tyre në programim.

Të gjithë të interesuarit mund të marrin pjesë dhe të përfitojnë nga këto trajnime të vlefshme, duke u bërë pjesë e brezit të ri të programuesve në Kosovë./PodujevaSot