Profesori që anuloi punime diplome, gjeti plagjiaturë (VIDEO)

Shitësit e temave të diplomës me pagesë ose nuk e dinë, ose nuk i shqetëson fakti se duke e ushtruar një veprimtari të tillë ilegale po bëjnë vepër penale dhe mund të dënohen me burgim deri në 3 vite.

Praktikat e punimit të diplomave me pagesë, sipas avokatit Arbër Jashari, përvec që janë vepër penale, duhet të trajtohen me seriozitet nga organet e drejtësisë. Mirëpo për këtë, Jashari thotë se ligjet e Kosovës kanë mangësi, veçanërisht në lidhje me abuzimet që lidhen me sistemin e arsimit dhe administratën shtetërore.

Avokati Jashari gjithashtu shpjegoi se, në rastin kur një person zyrtar është i përfshirë në këtë aktivitet, kjo përbën një keqpërdorim të detyrës zyrtare dhe është një shkelje e rëndë e ligjit.

Dekani i Fakultetit Filozofik në Universitetin e Prishtinës, Bekim Baliqi bëri të ditur faktin kryesor, i cili duket se po iu hap terrenin mashtruesve të vazhdojnë veprimtarinë e tyre.

Kjo sepse, sipas Baliqit, Universiteti i Prishtinës ende nuk e posedon mekanizmin i cili e gjen nëse një temë diplome apo hulumtim ka plagjiat dhe rjedhimisht është e blerë.

Mirëpo, siç thotë ai, përmes hulumtimit vetanak, disa herë në të kaluarën ka ndodhur që të anuloj temat e studentëve me gjetjen se ka plagjiaturë brenda temës së tyre.

Duke qenë se përgatitja e diplomës me pagesë është vepër penale, Policia e Kosovës ka dërguar në adresën e Kiksit numrin e rasteve dhe krahasimin e tyre mes viteve 2022 – 2024.

Bazuar në të dhënat e policisë, në vijim gjeni statistikat të dhëna për Veprën Penale, Neni 390* Falsifikimi i dokumenteve, për periudhën kohore 2022-2023-2024. Viti 390* Falsifikimi i dokumenteve 2022 365 2023 266 2024 214.