Leart Sveçla shpallet studenti më i mirë në Kore të Jugut

Leart Sveçla, një i ri nga Kosova, ka arritur një sukses të jashtëzakonshëm në arenën ndërkombëtare, duke u diplomuar me nderime në programin prestigjioz Dream Together Master të Seoul National University, Kore e Jugut.

Programi, i njohur si një ndër më të mirët në botë për Menaxhimin e Sportit, shpalli Leartin si “Studentin më të dalluar të gjeneratës” (valedictorian) dhe i dha çmimin për “Temën më të mirë të diplomës”, në mesin e studentëve nga vende të ndryshme të globit.

Në fjalën e tij gjatë ceremonisë së diplomimit, Learti shprehu mirënjohje për mbështetjen e familjes, miqve dhe të gjithë atyre që i qëndruan pranë në këtë rrugëtim të jashtëzakonshëm. Gjatë studimeve, ai ka promovuar me krenari kulturën dhe vlerat e Kosovës, duke ndarë me kolegët ndërkombëtarë historinë dhe traditat tona më të mira.

Ky arritje nuk përfaqëson vetëm një sukses personal, por është një moment krenarie për të gjithë vendin. Learti ka shprehur dëshirën për t’u rikthyer në Kosovë dhe për të kontribuar në zhvillimin e menaxhimit të sportit dhe fuqizimin e kulturës sportive në rajon.

Suksesi i Leart Sveçlës është një frymëzim për të gjithë të rinjtë që synojnë të tejkalojnë kufijtë dhe të arrijnë majat në arenën ndërkombëtare. Ai na tregon se me përkushtim, punë dhe pasion, çdo ëndërr mund të realizohet.