Ardiana Thaçi shpallet gazetarja e vitit

Ardiana Thaçi – Mehmeti, gazetarja dhe autorja e emisionit Kiks Kosova që transmetohet në Klan Kosova, është shpallur Gazetarja e Vitit 2024 nga Asociacioni i Gazetarëve të Kosovës.

Thaçi – Mehmeti e mori çmimin në fjalë për hulumtimin për grupin famëkeq, Albkings, që ishin shndërruar në makth për gratë kosovare.

Në edicionin e lajmeve në Klan Kosova, ajo u shpreh se hulumtimi në fjalë pati efekt pozitiv duke shkaktuar mbylljen e këtyre grupeve nga institucionet e vendit.

“Në fakt të bësh gazetari hulumtuese është vështirë në Kosovë, nuk është e lehtë, për shkak se ke shumë sfida. Por, normalisht që KIKS Kosova e ka një ekip kompakt, i cili ka ndihmuar shumë për të bërë këtë punë që ne e kemi bërë bashkërisht”.

“Në aspektin personal kjo ka qenë sfidë më e madhe, sesa sfida në aspektin e punimit të storjeve për shkak se ka prekë direkt në qenien time si individ, në qenien time si nënë, si grua edhe si fëmijë i dikujt, do të thotë më tepër janë lënduar rrethi im për atë që më kishte ndodhur mua”.

“Thjesht, pavarësisht lëndimit, unë dola të tregojë publikisht për ngacmimet që po vinin prej burrave të ndryshëm ndaj grave, vetëm e vetëm për t’iu dhënë zë grave që nuk patën zë. Realisht, pati një ndikim të publikut, sepse reaguan institucionet, pati arrestime dhe grupet për fat u mbyllën”, ka thënë Thaçi –  Mehmeti.

Nga shtëpia mediatike Klan Kosova, edhe gazetarja tjetër, Qëndresa Bellagoshi, u shpërblye me çmimin e parë për antigjipsizëm.